انا مل الامل فيني .. يدور للشفاه اصوات
عجز صوتي ينادي لك .. قضى قلبي من سواتك
نصيتك والوفا زادي .. رحلت والقلوب اشتات
مصايب والرجا خايب .. تقود خطاك رغباتك
كبيره طعنتك هذي .. تعودت على الطعنات
غريبه حيل ذا المره .. ولاهي مثل طعناتك
سألتك بالذي خلى عيونك تذرف الدمعات
تكف الدمع لاتجني على خديك دمعاتك
انا ما قد خبرت اني تعمدت اجرحك بالذات
وانا ماهمني غيرك اعيش من اجل مرضاتك
سرقتك بالزمن لحظه وعشتك بالفراق اوقات
ولا ادري وش بقى لي بالعمر من دون لحظاتك
أحبك .. رحت ادور في قواميس البشر كلمات
عجزت القى حروفٍ تستريح بصدر كلماتك
أحبك .. يا ندى فجر الجروح وصحوة العبرات
أحبك .. كلمـةٍ تبكـي معـانيها على شفـاتك
تردي الخطا يمي .. تزيد من الالم شرهات
وانا صمت الشقا فيني حكى من كثر شرهاتك
توالت كلها فجأه .. تعاظم بالحشا صدمات
يجي يوم وتواري شمسنا من ليل صدماتك
ذكرتك .. والدروب اللي تعانق خطوتك بسكات
وانا ما زلت اسافر بين نظراتك وضحكاتك
ذكرتك .. وانطفى جمر الكلام وذابت الشمعات
سهرتك واستفزيت النجوم بليل مرضآتك
تعال .. واذرف دموعك على قلبٍ كثيره مات
تعال .. واخذ الباقي يفيد لوقت عزواتك
تعال .. لاتخلي السنين المقبله تقتات
من افراحي ولحظاتي وطرباتي .. وسبحاتك
تغيرت ولا ادري وش جرى .. وش غير النيات
سألتك واعتكف برد الجواب فـ معطف آهاتك
تقول انطتي في راحه .. واقول من القهر هيهات
انا لا جـيت للراحـه .. تطـاردني مسـافـاتك