الرئيسية
موضوع اليوم عن الأمور التي يجب معرفتها قبل شراء الحيوان أو الطائر الذي تريد
بالبداية وقبل كل شي الشخص لازم يفكر ليه انا ابي هالحيوان او الطير ؟
يعني على سبيل المثال انت تحتاج هالحيوان حق زينه و ديكور مثل احواض الاسماك ولا تحتاجه حق حراسة مثل كلب الحراسة ولا تبي حق البيض مثل تربية الدواجن ولا تبي حق التسلية مثل القطط ....وألخ
بعد ما تحدد الامر الأول نروح حق الخطوة الثانية وهي:
هل انت عندك المكان المناسب للحيوان ولا الطير الي بتشتريه؟
المكان الملائم للحيوان او الطير من الامور الأساسية الى الواحد لازم يفكر فيها قبل الشراء فلكل حيوان و طير مكان لازم يحس فيه بالأمان و الاطمئنان مثل ما تروح تشتري لك كلب شكبر و تخصص له محيط صغير في البيت او تاخذ له بيت ضيج عليه او تشتري طير كناري او متوه خضرة و تخليهم في المطبخ مثل ما اغلب العيايز يسون
و الامر الثالث الي راح اتكلم عنه هو:
الميزانية
قبل التفكير في نوع الحيوان او الطير الي راح اخذه افكر هل انا عندي الميزانية الكافيه لتوفير شتى سبل الراحة و الصحة للحيوان او الطير الي باخذه يعني في حيوانات و طيور تكلفة مصاريفهم وايد عالية مثل الاحواض البحرية و الكلاب
الامر الرابع و هو ايضاً مهم رغم تغافل الناس عنه و هو
هل انا عندي اطفال في البيت؟
النقطة مهمة و خصوصاً مع اليهال الفضوليين فممكن يسببون الذعر و الخوف عند الحيوان او الطير تلقى هالياهل النزغة يطق القفص بيده ولا يقط في القفص ماله اشياء قد تضر الحيوان يعني انا اتذكر بنت خالتي يوم كانت صغيرة ذبحت متوه امي قامت تعطيها اصباغ ماجي كلر و ماتت مسكين، تشوف الاب المسكين يروح يشتري الحيوان ولا الطير و يقول حق العيال شنو حق العيال
هذه روح و مسئولية بتتحاسب عنها يوم القيامة ان شاء الله ,و لا واحد عياله فيهم ربو يروح ايب لهم قطوه حق الشعر مالهاو الامر الخامس سلمكم الله هو:
الوقت
قبل لا تفكر في احضار الحيوان ولا الطير أسال نفسك هل انا عندي الوقت الكافي عشان أهتم في هالروح الي بشتريها؟ يعني مثل ما تعرفون تربية الحيوانات يبي لها أيضآ مزاج و عدم تقصير يعني في ناس هداهم الله يروح يشتري الطير ولا الحيوان و يهتم فيه اول الايام وبعد فتره يهملهم ولا ماعطهم حقهم او تشوفه يقصر في امور ثانية في سبيل تربية الحيوانات تلقاه مهتم بالكلب ولا القطوه اكثر من أهتمامه وجلوسه مع زوجته و عياله.
و الامر السادس يا رعاكم الله هو:
لازم تكون على علم و لو قليل بالحيوان او الطائر قبل لا تشتريه
يفضل قبل لا تقرر بالشراء انك تقرأ و تشوف وتسأل ناس عندهم خبره في هالامور يعني لازم الواحد يعرف شنو الغذاء الرئيسي للحيوان ولا الطير الي بياخذه و يعرف بعض سلوكياته و احتياجاته لأنه كثير ناس يشترون على عماهم و ينصدمون بالموت المفاجئ ولا مرض الطير او الحيوان الي شراه بسرعة يا اخي اسأل و اقرأ قبل لا تقدم على شراء الطير أو الحيوان
منقول للفائدة واذا فيه زود على الموضوع ياليت تضيفونه
ولكم كل الشكر
