توضيب المكينة والقير العادي

صراحه حصلت هالموضوع وأعجبني أنكم أن شاء الله تستفيدون منه
بنتكلم في ها الموضوع عن .

1- توضيب المكينه : وراح ندخل في الموضوع بشكل كبير وموسع ومفهوم

2- توضيب القير : وراح نتوسع فيه انشاء الله بطريقه مفهوم وسهله جداً

بسم الله الرحمن الرحيم

الكثير منا يسمع عن كلمة (( توضيب مكينه )) ومعناه تجديد المكينه من الداخل وتهيئتها للوجه المطلوب

طبعاً عند الحاجه

وفي توضيب المكينه ان كانت (4 - 6 - 8 - 12))سلندر تستخدم نفس الاليات المطلوبه

وبرضو راح نستخدم قطع التوضيب المطلوبه لاي حجم من المكائن ولاكن حسب الطب والتلفيات

اول شي نتكلم عن القطع المطلوبه والاساسيه في التوضيب (ملاحضه انا اتكلم عن التوضيب الصحيح مو توضيب اي كلام )

القطع المطلوبه كألاتي

1- طقم بلوف (طقم هواء ) + (طقم نار )

2-طقم شنابر

3- بساتم ثابته

4 - بساتم متحركه

5 - وجيه

6 - طرمبة زيت ((عند الحاجه والافضليه انها تتغير ))

طبعاً هذي القطع لابد من تغيرها علشان المكينه تعيش سنين من دون اي مشاكل

زياده على ذالك لابد من الاتي :

فك راس المكينه وخرطه في المخرطه

طبعاً المخرطه راح تسوي خرط للسلندر + خرط مجاري البلوف + خرط مجاري وتنضيف الراس وجميع المجاري الموجوده داخل المكينه

السبب :

فائده الخرط انه يزيل الترسبات الموجوده داخل المكينه
ان كانت ترسبات مائيه او ترسبات كربون على جدار السلندر

وبكذا تكون المكينه موضبه من الداخل وراح تعيش معك سنين بدون اي مشاكل

الاسعار :

سعر شغل المخرطه ينحصر من 300 الى 450 حسب الشغل وفي اغلى من كذا وفي ارخص كمان وطبعا يفرق اذا كانت المكينه 4 او 6 او 8 سلندر

سعر شغل الورشه ينحصر مابين 300 ريال الى 600 ريال وبرضو حسب الشغل ومهارت الفك والتركيب والوزن
يعني مو اي ورشة تضبط التوضيب على الوجه المطلوب

اما اذا كنا بنتكلم عن توضيب اي كلام ((تلفيق))

فهاذ الشغل ماينفع اذا كنت راح تستخدم الموتر لمده طويله
ينفع في حالتين :

اذا كان الموتر ما يسوى
او
انك راح توضبه وتبيعه

طبعاً في التوضيب الى اي كلام ما راح تكلفك شي ولا اصلن راح تشتري قطع الى في حاله واحد
وهي اذا كانت المكينه تشنبر زيت فراح تشتري طقم شنابر وهذي رخيصه جداً

اما بالنسبه للبلوف والبساتم فراح تنفك وتتصنفر وتتركب وهذا ما يسمى توضيب التوضيب الممتاز انه كل القطع تتجدد في اول قطعه الى اخير قطعه

وانا الصراحه ما انصح فيه ابداً ابداً وعلى قولة المثل الشعبي ((كنك يا زيد ماغزيت )) طلع من صلب الموضوع

هذا بالنسبه لتوضيب المكينه

وهذا الى يحضرني الان واذا كنت ناسي شي انشاء الله معلمين المكا+++++++++ا الى بالمنتدى يذكروني فيه .

والحين راح نخش في موضوع توضيب القير ( العادي )<<<<< راعي طويله .وانشاء الله في موضع اخر راح اتطرق للقير الاوتماتيك

بالنسبه لتوضيب القير العادي ينقسم الى قسمين :

1-توضيب سطحي

2-توضيب كامل

في البدايه نتكلم عن التوضيب الصطحي

ومعناها ان التوضيب لا يشمل جميع قطع القير بل يشمل القطع التالفه فقط

يعني بشكل اوضح في التوضيب السطحي راح نغير ثلاث قطع هي :

1- صحن
2-فحمه
3-دسك

هذي القطع المطلوبه في التوضيب السطحي طيب وش السبب ؟؟

راح نستخدم التوضيب السطحي في حالة ان تكون التروس الموجود في القير سليمه جداً ولاكن توجد مشكله في القير

ومن المشاكل : ثقل في عامدو التغيير او ضعف العزم او او ان الترس ما يمسك مع باقي التروس (يعني كأنك تغير من دون ضغط دواسة الكلتش )

فذالك اول شي راح نفك القير كامل ونفحص التروس ترس ترس اذا كانت سليمه نتقل الى المرحله الثانيه وهي فحص الدسك والفحمه والصحن
اذا كانت هذي القطع معطوبه راح نستبدله بجديده وبعد ذالك راح تلاحض فرق في السياره من ناحيت :
1-العزم راح بفرق معاك للأفضل

2-راح يخف عامود القير ويصير العامود سهل الحركه

3- اول ماتضغط الكلتش وتغير الى نمره ثانيه راح يسمك معك على طول بدون اي صوت

والسبب في هذي التحسنات
انه راح يكون الفصل بين المكينه والقير صحيح 100% وبرضو الفصل بين التروس راح يكون صحيح ومافيه اي مشاكل

وبكذا نكون انتهينا من القسم الاول من توضيب القير

باقي القسم الثاني

التوضيب الكامل
طبعاً التوضيب الكامل مشابه للتوضيب السطحي ولاكن فيه فرق في المشاكل مثل ان القير ما يلقم الى بعد عشرين محاوله او اكثر

في بعض الحالات القير يفضي نفسه بنفسه يعني وانت تمشي بالنمره الخامسه يرجع القير الى الفاضي

بكذا نعرف ان التروس فيه مشكله
وبهذه الحاله راح نفك القير ونفحص التروس ونشوف التروس المضروبه ونستبدلها بجديده وهذا كل يتم عند المخرطه

طبعاً التوضيب الكامل راح ترتفع التكلفه شوي لأن راح يدخل بالمسئله المخرطه وكمان تروس جديده

وفيه بعض الحالات تتوقع ان القير كامل يبغاله توضيب ولاكن بعد ماتفك القير وتفحصه راح تكون السالفه كلها بايخه

ومثال على كلامي

عندي القير بالهوندا بعد الحادث طلع يجيب الهم ومايلقم بسهوله ومافيه عزم والمكينه صارت تحن لان الكلتش مايفصل صح بين المكينه والقير

توقعت انا ان السالفه فيها تغيير تروس بس بعد مافكينا القير وفحصناه صارت التروس سليمه المشكله كلها في الصحن والفحمه والدسك غيرتها

ورجع عزم الموتر احلى من اول واختفت الحنه الى في المكينه وصار التغييره سلسه جداً مع ان الموتر ماشي 550 الف كيلو متر

ومع ذالك صارت التروس سليمه جداً فماقدر اقول الى ان عالم خرابات السيارات وسيع جداً
وماتقدر تحكم من اول نضره للسياره و احسن شي ان الواحد يفحص بالعين ولا يكتفي بالتجربه فقط .

(((وهذي صور لداخل المكينه والقير)))

اولاً نبداء بالمحرك من الداخل

1-هذي صوره للبلوف وكيف عملها داخل المكينه
http://www.racing4e.com/data/media/16/dyn1.jpg

2-صورة البلوف والبساتم (طبعاًالبلوف هي الى تضهر في اعلى الصور والبساتم تضهر في اسفل الصوره)

http://www.racing4e.com/data/media/16/engine-cam.JPG

3-وهذا مايعرف بأسم (عامود التيمن)
http://www.racing4e.com/data/media/1...stage1_cam.JPG


5- وهذا شكل عام لراس المكينه

http://www.racing4e.com/data/media/1...der_head_1.jpg

6-هذي صوره تضم فيها ذراع البستم والبستم نفسه

http://www.racing4e.com/data/media/1...p_ls2_08_z.jpg

7-هذي صورة الكرنك

http://www.racing4e.com/data/media/17/cranck_2.JPG

ثانياً صور القير

1-صورة القير الخارجي

http://www.racing4e.com/data/media/6...comparison.jpg

2-وهذي صورة الكلتش

http://www.racing4e.com/data/media/6...lutchassy1.jpg

3-صورة مايسمى بـ(الحذاف)او(الترس الرئيسي)(flywheels)

http://www.racing4e.com/data/media/6...-82149-001.jpg

4-صورة الدسك

http://www.racing4e.com/data/media/6/Twin_Disk_CM_1.jpg

الله يسلمك موجه ما احد عبر موضوعي الا أنتي بس يكفيني تواجدك
تسلمين والله ولك كم هائل من التشكرات

موضوع مفيد لك الشكر يا سهم بارك الله فيك

افا يا ولد العم انت وموضوعك على الراس والعين بس تدري الجامعه والظروف تحكم
والف شكر يا ولد العم ماقصرت ولا تزعل من التأخير

الله يعطيك العافيه ياولد العم موضوعك مره جميل ورائع تقبل مروري